భగవద్గీత - రాజవిద్యా రాజగుహ్య యోగము - తొమ్మిదవ అధ్యాయము
రాజవిద్యా రాజగుహ్య యోగమునందలి ప్రధాన విషయములు
రాజ పదము శ్రేష్ఠత్వమును సూచించును. రాజవిద్యయనగా విద్యలలోకేల్ల శ్రేష్ఠమైనదనియు, రాజగుహ్యమనగా రహస్యములలోకెల్ల పరమరహస్యమైనదనియు అర్థము. లేక, రాజవిద్యయనగా పూర్వకాలము రాజులు అనుష్టించుచువచ్చిన గొప్పవిద్యయనియు చెప్పవచ్చును. ఈ అధ్యాయమునందు చెప్పబడిన అమూల్యమగు అధ్యాత్మబోధ విద్యలన్నిటిలోను సర్వోత్కృష్టమైనదియు, రహస్యములన్నిటిలోను పరమరహస్యమైనదియు అయియుండుట వలన ఈ అధ్యాయమునకు రాజవిద్యా రాజగుహ్య యోగము అను పేరు వచ్చినది.
- ఆధ్యాత్మవిద్యా ప్రభావము (1వ శ్లో॥ నుండి 3వ శ్లో॥ వరకు)
- భగవత్స్వరూప వర్ణనము (4వ శ్లో॥ నుండి 6వ శ్లో॥ వరకు)
- జగదుత్పత్తి (7వ శ్లో॥ నుండి 10వ శ్లో॥ వరకు)
- ఆసురీప్రకృతి కలవారియొక్కయు, దైవీప్రకృతి కలవారియొక్కయు లక్షణములు (11వ శ్లో॥ నుండి 15వ శ్లో॥ వరకు)
- భగవానుని సర్వాత్మ స్వరూపము (16వ శ్లో॥ నుండి 19వ శ్లో॥ వరకు)
- స్వర్గాదికామనారూపమైన సకామోపాసనయొక్క ఫలము, నిష్కామోపానయొక్క ఫలము (20వ శ్లో॥ నుండి 25వ శ్లో॥ వరకు)
- భగవద్భక్తితో గూడిన నిష్కామకర్మాచరణముయొక్క అఖండమహిమ (26వ శ్లో॥ నుండి 34వ శ్లో॥ వరకు)